По филмот Skyfall, Кинезите ја „масакрираа“ и научно фантастичната драма „Атласот на облаците“, кој е скратен за речиси 40 минути.

Прво од последното продолжение на сагата за Џејмс Бонд ги „исекоа“ сцените во кои се споменува Кина, девојките на Бонд кои ги покажуваат своите убави тела, го сменија преводот на разговорот на главните актери, а сега „палавости“ правеа и на остварувањето на Том Тиквер и браќата Вашовски од кои се исфрлени сите сцени на секс, па филмот наместо 172 трае 134 минути.

Продуцентите на „Атласот на облаците“ велат дека не ја виделе цензурираната верзија, но дека се уверени дека кинескиот дистрибутер направил адекватни измени за да го заштити „интегритетот на филмот“.

Тие наведоа дека знаеле дека ќе мораат да се „потчинат под барањата за цензура“ за нивниот филм да може да се прикаже во Кина чии власти донеле закон во кој во тамошните кина е дозоволено во текот на годината да се прикажат само 34 странски остварувања, од кои 14 мораат да бидат во 3D или IMAX формат.

Меѓутоа, пиратеријата во Кина „цвета“ па на интернет можно е да се најдат сите холивудски филмови - нецензурирани.

„Атласот на облаците“ е филмска верзија на генијалниот роман на Дејвид Мичел во кој главните улоги ги толкуваат Том Хенкс, Хали Бери, Хју Грант, Џим Стурџес и Хјуго Вивинг. Филмот трае 172 минути за да го опфати „огромното“ дејствие од книгата, шест приказни кои се протегаат од Америка во средината на 19 век, до далечна иднина на островите кои некогаш се нарекувале Хаваи.

Сите актери играат повеќе улоги во филмот кој го режираа Енди и Лана Вашовски („Матрикс“) и Том Тиквер („Трчи, Лола, трчи“).