Третата сезона е снимена, а екипата на серијата разговара за измените, новите ликови и уште пожестоката акција.

Хит серијата на HBO „Игра на тронови“, по серијалот „Песна за мраз и оган“ од Џорџ Р. Р. Мартин, следната пролет влегува во третата сезона.

Омилените ликови од популарниот епски фантастичен серијал се враќаат на малите екрани. На Питер Динклеџ, Емилија Кларк, Мејси Вилијамс, Алфи Ален, Кит Харингтон и другите им се придружуваат Ричард Дормер како Берик Дондерион, Натали Емануел како Мисандери, Сјаран Хајндс како Менс Рајдер и многу други.

Тетата сезона ќе биде базирана на првата половина од тетата книга „Бура од мечеви“, чие обемно дејство не би го собрало во една сезона, според проценката на продуцентите. Снимена е во Северна Ирска, Хрватска, Мароко и Исланд.

„Играта е поопасна од било кога. Мислам дека фановите на серијалот ќе бидат воодушевени од акцијата, изборот на актери за новите ликови, но и прекрасните локации на кои снимавме“, рече продуцентот, сценаристот и режисер Дејвид Бениоф.

Претходните две сезони освоиле 25 од 34 награди за колку што беа номинирани. За сега најуспешен член на екипата е Динклеџ, на кого улогата на Тирион Ланистер му донесе два Златни глобуси, Satelitte и Scream наградите.

Третата сезона почнува на 31 март следната година. Погледнете како е снимена.