Холивудскиот актер Харисон Форд би можел да ја репризира својата улога во новиот филм од серијалот „Војна на ѕвездите“.

Според пишувањето на медиумите, серијалот во кино-салите би требало да се појави во 2015 година.

Форд (70) го играше Хан Сол во првите три дела од „Војна на ѕвездите“, но не е исклучена можноста да биде вклучен во снимањето на седмиот филм од серијалот.

„Харисон е отворен за идејата да сними филм и воодушевен е поради тоа, сите тројца се“, рече добро известен извор, алудирајќи на колегите на Форд, Марк Хамил кој го играше Лук Скајвокер и Кери Фишер која ја играше принцезата Леја.

Форд стана популарен благодарение на првиот филм „Војна на ѕвездите“ од 1977 година и неговите две продолженија кои ја сочинуваа првобитната трилогија.

Во новата трилогија снимена меѓу 1999 и 2005 Форд не се појави, и дури ја отфрли таа можност, кажувајќи дека ликот повеќе не му е интересен.

Инаку, компанијата Дизни минатата недела ја купи „Војна на ѕвездите“ од компанијата на Џорџ Лукас за четири милијарди долари и најави планови за оживување на овој научно-фантастичен серијал.

„Војна на ѕвездите 7“ премиерно ќе биде прикажан во 2015 година и „ќе продолжи да ја истражува сагата Војна на ѕвездите и да ја развива франшизата за иднината“, наведено е во соопштението.