Ева Лонгорија, Фелисити Хафман, Марша Крос и Тери Хачер нема да тргнат по патот на Кери Бредшо и нејзината екипа.

Авторот на серијата, Марк Чери, рече во интервју за една американска телевизија дека не планира своите хероини Габи, Сузан, Линет и Бри да ги „прати во Дубаи“, алудирајќи на „преселувањето“ на ѕвездите од „Сексот и градот“ на големото платно.

„Моите девојки нема да одат во Дубаи. Заборавете ја идејата за филмот“, категорично рече Чери.

После осум сезони, на „Очајните домаќинки“ им се приближува крајот, а Чери додаде дека фановите во последните епизоди можат да очекуваат враќање на некои „заборавени“ ликови.

„Грижливо ја чуваме тајната за финалето на серијата, но можам да ви речам дека ќе видите некои драги, а заборавени лица“, рече тој.

Чери најави дека планира, во стилот на Алфред Хичкок, лично да гостува во една од последните епизоди, во некоја помала улога.

„Мислам дека шминкерите и фризерите тој ден ќе се намачат повеќе отколку што се намачија за сите овие години со актерките“, заклучи тој.