Во сабота вечер, во Берлин беше одржано доделувањето на Европските филмски награди. Најсреќен човек таа вечер беше данскиот режисер Ларс фон Триер.

Имено, неговиот филм „Меланхолија“ го освои „европскиот Оскар“ во најважната категорија со што го повтори успехот од 1996 и 2000 година, кога победи со филмовите „Кршејќи ги брановите“ и „Танцувач во темнината“. Данецот така стана втор режисер во историјата кој три пати ја освои таа награда.

Дека данците доминираат потврди и режисерката Сузан Биер која за филмот „Во подобар свет“ е наградена за режија. За најдобри актери се прогласени британците Тилда Свинтон за филмот „Треба да разговараме за Кевин“ и Колин Фирт за „Говорот на кралот“.

Исто така, наградено е сценариото на белгиските браќа за „Момчето на велосипед“ и документарецот на Виндерс „Пина 3D“, и краткиот филм на Тери Галијам - „Целото семејство“.

Награда за животно дело доби Стивен Фрирс.