Виго Мортестен не е меѓу актерската екипа за филмот кој во кино салите доаѓа на 14 декември 2012 година - „Хобитот: Неочекувано патување“.
Во интервју за Movies.com, Мортестен рече дека продуцентите при една прилика го прашале дали повторно би го глумел Арагорн.
„Се разбира дека би го глумел. Попрво би го отелотворил јас, отколку да гледам како некој друг го прави тоа“, рече за филмот кој го режира Питер Џексон. Но, улогата никогаш не му била понудена, а снимањето почнало.
Шансата Арагорн да се види во „Хобитот“ е многу мала, речиси никаква. „Мојот лик не е во филмот. Освен ако немаат некој последно-минутен план. Но, мислам дека за него би слушнал до сега“, рече тој.
„Орландо Блум и Кејт Бланшет се појавуваат во филмот, но тие се самовили, па не умираат“, тврди 53 годишниот актер. „Но, како што знаете, Арагорн е полу-самовил, па и тој живеел неколку стотина години и можел да биде внесен во филмот. Но, мислам дека тоа сепак нема да се случи.“
Но, иако нема да го отелотвори Арагорн во „Хобитот“, Мортестен признава дека ангажманот во трилогијата „Господарот на прстените“ многу му значел.
„Беше тоа важен период во мојот живот. Секогаш ќе бидам благодарен што трилогијата беше толку успешна и ми отвори нови шанси во оваа професија“, рече искрено овој талентиран актер, кој никогаш нема недостаток од понуда за работи. Така во филмот „Опасен метод“, на режисерот Дејвид Кроненберг го отелотворува Сигмунд Фројд. Со него во филмот игра убавата Кира Најтли.
По филмот „Хобитот: Неочекувано патување“, следи неговото продолжение, „Хобитот: До таму и назад“, кој во кината ќе се појави на 13 декември 2013 година.
