Месец дена откако беше пуштен официјалниот трејлер за режисерското првенче на Анџелина Џоли, „Во земјата на крвта и медот“, претставен е и постерот за филмот чие дејство е сместено во Босна и Херцеговина.

Снимањето на филмот „Во земјата на крвта и медот“, режисерското првенче на актерката Анџелина Џоли, го следеа многу контроверзии. Поединечни здруженија во БиХ се обидоа да го забранат филмот тврдејќи дека ги навредува жртвите на војната.

Во средината на дејството е љубовната приказна на српскиот војник Даниел (Горан Костич) и воена заробеничка, босанката Ајле (Зана Марјановиќ), кои и пред војната биле во љубовна врска.

Филмот ги следи по почетокот на војната, кога тие ќе се најдат на спротиставени страни.

Американската премиера на филмот е најавена за 23 декември оваа година, а филмот ќе се прикажува на босански јазик, иако е снимена и англиска верзија.