Иако трејлерот за режисерското деби на Анџелина Џоли е објавен на англиски, филмот „Во земјата на крвта и медот“ во американските кино-сали од 23 декември ќе биде прикажан на „автентичен јазик“.

Славната актерка и новопечената режисерка, својата љубовна драма сместена за време на војната во Босна, а која е снимена на англиски и „српско-босанско-хрватски јазик“ сепак ќе ја прикаже на јазиците на народите кои ја инспирирале Анџелина за филм.

„Почестена сум со тоа што FilmDistrict одлучи филмот во Америка да се прикаже на автентичен јазик. Од секогаш сум се надевала дека америкнската публика ќе има шанса да ја види таа верзија“, изјави Анџелина.

За сега не е познато дали филмот „Во земјата на крвта и медот“ и во другите земји ќе биде прикажан на „автентичен јазик“ или европската публика ќе мора да го гледа на не така добар англиски.