Стигнаа првите критики за филмот на Мадона за романсата на крал Едвард VIII и „холивудската распуштеница“, Волис Симпсон...

„Многумина ќе ја презираат и идејата за одење во кино и гледање на филм од проста причина што Мадона го режираше W.E., но ќе бидат пријатно изненадени кога би го погледнале...“, вака пишува филмскиот критичар од интернет порталот Daily Mail.

„Кога луѓето не би го знаеле името на режисерот, би уживале во една од најкомплицираните и можеби најубави љубовни приказни во историјата. Приказната за кралот кој се одрече од престолот поради љубов.“ Критичарот Баз Бамигбој додава дека Мадона ја проучила историјата, „веројатно за да не се засрами со неточни податоци“, како и тоа дека филмот, ако не друго, ќе биде прогласен за „филм со најдобри костими“.

Насловот на филмот, поточно иницијалите W.E., ги претставуваат иницијалите Волис и Едвард, а самото остварување почнува со „модерна паралела на приказната“, поточно со приказната за несреќно оженетата Воли Винторп.

„Што може американска пејачка која последните три децении ‘се измислува’ сама себе со менување на бојата на косата и гардеробата, воопште да знае нешто за историјата на британското кралско семејство?“, се прашува критичарот. „Па... знае многу. Веројатно професионалците ќе најдат некој недостаток, посебно околу приказната за абдикација и претерувањето да докаже дека ‘војводата и војвотката’ не биле симпатизери на нацистите, но Мадона од сега е вистински режисер. Приказната ја проучувала со години пред да одлучи да сними филм.“

Бамигбој пишува дека сите знаат дека оваа љубовна приказна на кралот го чинела неговиот престол, но дека Мадона во филмот „паметно го постави прашањет- што Волис Симпсон морала да плати поради таа љубов“.

„Кралот ме искористи за да го избегне затворот само за да ме зароби во неговиот“, ја цитира критичарот фразата од филмот со кој го докажува своето тврдење.

„Некои луѓе со години ги остреа ножевите и го чекаа филмот на Мадона, но тие ножеви би можеле да им послужат за да ги пресечат врските за старите ставови за неспособноста на Мадона да се докаже во светот на филмот.“

Филмот W.E. вчера беше прикажан премиерно на Венецијанскиот филмски фестивал.