Со проекција на политичката драма „Мартовска ида“ во режија на Џорџ Клуни, во Венеција денеска започнува 68-от меѓународен филмски фестивал...

За Златниот лав на овогодишната Мостра се натпреваруваат 23 остварувања, а организаторите на фестивалот најавуваат дека во публиката ќе се најдат Кира Најтли, Кејт Винслет, Гвинет Палтроу, Мет Дејмон и Колин Фирт.

Во конкуренција за главна награда на фестивалот се наоѓа новата адаптација на романот „Оркански височини“ од Емили Бронте во режија на Андрее Арнолд. „Момчето, дамата и шпионот“ во режија на Томас Алфредсон со Колин Фирт и Гери Олдман во главните улоги, „Касапење“ на Роман Полански со Кејт Винслет и Џуди Фостер, „Убиецот Џо“ на Вилијам Фридкин, „Тексашките полиња на смртта“ на Амиј Канан Ман и „Опасен метод“ на Дејвид Кроненберг.

Режисерот Џони То ќе го претстави филмот „Живот без принципи“, а Александар Сокуров остварението „Фауст“.

Фестивалската публика надвор од натпреварувачката селекција ќе може да го погледне египетскиот документарен филм „Тахрир 2011“ како и филмот на Мадона - „В.Е.“.

На фестивалот ќе биде претставен и дел од филмот „Доктор Реј и ѓаволот“ во режија на Динк Туцакович, кој зборува за престојот на Николас Реј во Белград.

Во жирито на натпреварувачката селекција на овогодишниот Венецијански филмски фестивал се американскот режисер Тод Хајнс, францускиот синеаст Андре Тешине и некогашниот фронтмен на алтернативната рок група Talking Heads, Дејвид Бирн.