Археолог тврди дека на ридот Св. Миховил ги пронашол гробиштата кои писателот ги споменува во „Божествената комедија“.

За време на реконструкцијата на водоводната мрежа во центарот на Пула, багерите „закачиле“ подземни гробови - на само 30 сантиметри длабочина, а за сега се претпоставува дека станува збор за гробиштата за кои пишувал Данте Алигиери.

Археологот од Пула, Желјко Ујчич, водител на археолошкиот надзор и истражување во тоа подрачје, вели дека станува збор за наоѓалиште на ридот Св. Миховил, на кој се наоѓал и истоимен средновековен манастир со гробишта.

„За сега се пронајдени неколку скелетни гробови обложени со крлушки, а колку уште има ќе знаеме наскоро, кога ќе продолжиме понатаму со работата на тоа наоѓалиште“, кажа Ујчич.

Во „Божествената комедија“ на Данте се споменува Пула и гробиштата, поради што многу мислат дека токму овие гробишта се споменуваат во тоа епско дело.

„Данте веројатно бил во Пула меѓу 1304 и 1308 година, за што немаме сигурни податоци. Меѓутоа, во својата ‘Божествена комедија’, која се состои од три дела ‘Пекол’, ‘Чистилиште’ и ‘Рај’, токму во првиот дел, во ‘Пекол’, се спомнува Пула и големи гробишта кои се простираат покрај Пула“, објасни Ујчич.