Дански историчар пронашол досега непозната бајка од Ханс Кристијан Андерсен.

Бајката „Свеќа од лој“ славниот дански писател ја напишал кога имал само 18 години, седум години пред официјално да дебитира како писател.

„Свеќа од лој“ е напишана на рака на шест страници, а на неа се наоѓа посвета за една жена, вдовица која живеела спроти куќата на Андерсен во неговиот роден град Оденс.

Бајката ја пронашол историчарот Есбен Браге во Националниот архив, во кутија со списи кои им припаѓале на богати семејства од родниот град на Андерсен.

Ханс Кристијан Андерсен (1805-1875) е еден од најпознатите светски автори на бајки. Напишал речиси 160 од овие приказни за деца, меѓу кои се и безвремените „Малата сирена“, „Грдото пајче“, „Палчица“, „Девојчето со кибритчињата“, „Принцезата на зрно грашок“, „Снежната кралица“ и други.