Најфлексибилниот и најпрецизниот термометар чија употреба е лесна и потсетува на ставање на привремена тетоважа, го создадоа научниците од Универзитетот на Илиноис, покажуваат резултатите од истражувањето...

Пронајдокот се прилепува кон кожата на пациентот, без воопшто да го мачи. Тоа е неинвазивен и е со дебелина едвај 50 нанометри. Претставува електронска мрежа со димензии 2 cм на 2 см, составена од сензори и минијатурни отпорници, фиксирана врз силиконска покриеност со микроперфорација што е еластична како човечка кожа.

Пронајдокот не предизвикува потење и не создава никакви грижи на пациентот. Тоа овозможува температурата да се мери, дури и ако пациентот се движи.

Научниците уверија дека со овој прототип е можно да се измери температурата со точност до еден илјадити дел од степен. Новиот термометар е прецизен како најсофистицираните инфрацрвени камери, истакнаа тие. Пронајдокот може да се користи исто така за мерење на нивото на хидратација на кожата. Тој може дополнително да биде адаптиран за набљудување на количеството крв при трансфузија и за откривање на инфекции на ткивата.

Користените методи за неговото создавање можат да најдат примена за развој на нови пронајдоци во медицината. Резултатите од истражувањето се објавени во Nature Materials.