Првото клиничко тестирање на мозочните матични клетки во терапија за мозочен удар се заврши со успеах и лекарите се подготвени да ја започнат втората фаза...

Независната проценка на здравствената состојба на првите три пациенти на кои им се вшприцани матични клетки во мозокот во Јужната општа болница во Глазгов, покажа дека тестот немал негативни последици.

Тоа значи дека терабијата би можела да биде тестирана на поголем број пациенти за да се дојде до нов начин во лечење на мозочниот удар.

Лекарите се надеваат дека матичните клетки ќе помогнат во обновување на оштетеното мозочно ткиво.

Професор Кит Мјур од универзитетот во Глазгов, кој беше водач на проектот изјави дека е задоволен со резултатите од тестот.

„Мораме да бидеме сигурни дека терапијата е безбедна пред да пристапиме на втората фаза. Ова е прв пат овој вид на терапија со матични клетки да биде испробан на луѓе, многу е важно да знаеме дека можеме безбедно да продолжиме со тестирањето. Во овој момент имаме дозвола да продолжиме со поголема доза на матични клетки“, рече тој.

Пациентот кој минатата година прв на светот доби терапија беше еден пензионер. Од тогаш терапијата е тестирана на уште две личности.

Сите три пациенти добиле многу мала количина матични клетки.

Во текот на наредните години, уште девет пациенти постепено ќе добиваат поголеми дози матични клетки, за првенствено да се утврди дали терапијата е безбедна за пациентите. Лекарите, паралелно, ќе работат на проценката кои се најдобрите начини за мерење на ефикасноста од терапијата.